الاسم / ابراهيم سليمان السيد المليجى
فرع / الشعر العامى
عنوان القصيدة / سِتينى
رقم التواصل / 01004406206
رابط الفيس / https://www.facebook.com/wwwhima2013
_________
ستِّيـني
في الحارة قاعد على قهوته
يشرب في شايُه وقهوته
٣٠ سنة ع الكرسي دا
عمال يرازي في وحدته
مـ الطاولة ملّ ومـ الدُمَنْ
من كام سنة يجي بهدوء يقعد وبس
أحاسيس كتير عدت عليه
دلوقتي اَهُه مابقاش يحس
ستّيني
ستّيني قاعد من زمان في الحتة دي
يحكى في مغامراته القديمة
ويضيف حاجات ..
كان نفسه تحصل لاجل الإثارة
عاش الحياة والحارة فيه
وكان نفسه جدًّا يركب الطيارة
ستّيني عاش وحياتنا أبيض وإسود
هلل في جون عبدالغني والنصر
ومالحقش حُزن النكسة
دلوقتي ..
من قلب قلب القاهرة في حارتُه
من كُتر تكرار الحياة بينسى
و يخش مع عقله في كل حبّة نِزال
على ذكرى عاشها وناس ناسيها
وفي تسعينياته هروبه م الزلزال
عمال يشيل و يحط من قلبه
عُمال في قلبه بينقلوا له عِزال
من مرحلة لمرحلة
من أسئلة لأسئلة
قاعد يفنط في الردود بهدوء
وسنين تفوت ويرد بِاستعجال !
قاعد على الكرسي
مستني دوره في رحيل الصحاب
ماكسبش ولا جايزة
وإن فاز فى يوم ..
هيفوز بجايزة أكتر حد ساب
ساب الحياة
ساب حب عمره
ساب ذكريات
ساب كل حاجة تفكره بكل اللى فات
ما اختارش حد
بيرد ع الناس ذوق وبس
وبيبقي مش عايز يرد
عدت عليه أيام كتير
دلوقتي عايش في الحياة ومابقاش يعّد
وفي يوم بيضحك بعد نكتة من الزمن
عدى ملاك الموت عليه قال: مُستعد؟
قال له: مُستعد .
فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون
