الليل عباية من كفن
مفروشة فوق ضهر الوجع سترة
والقلب طفل بـ يندفن
بـ يلملم الخوف في جِلد بُكرة
ناديت علي النور ينسكب
رد الصدىٰ بدموعي.. حَسرة
يا صاحبي.. يارفيقي
جوايا شـرخ من التعب
وعيوني قنديل بِـ ينطفي
واللي يشوفني يقول عفي
ما دريش بـ جرحي المختفي
أنا حي بس على الورق
والنار في روحي بـ تنطفي
أنا عمري لحن لغنوة باهتة
مبحوحة وف حلق السكوت
والضحكة خيط من عنكبوت
دايبة على حيط البيوت
أنا اللي جدري نبِّت في الخريف
والفرع ناشف م التعب
سكنتني طعنات الجراح
وفتحتِلك باب الظنون
دمعي ما عاد بـ يسـيل
واتجمد في نن العيون
ورضيت أكون طيف غريب
بدوّر فـ نفسي عليه
أمد إيدي للسراب
وارجع أبوس كفوف إيديه
أنا خيط في توب الحزن دايب
مالوش في العيد ولا الفرحة
أنا سطر في كتاب قديم وسايب
وسكوتي غطىٰ روحي بالطرحه
أنا اللي باقي مني حبة خضار
بيلمس في الوجع روحه
وقفت أشاور ع العمار ..
لقيتني في الفراغ.. لوحه
لا حد سامع صرختي
ولا قلبي باينت لُه جروحه
سكنت صمتي وغربتي
وسبت الحكي.. لصحابُه
خلاص مابقتش مستني
شروق الشمس يحييني
مفيش ولا حاجه بتعيني
وضل الروح يواسيني
رميت مفتاح ببان الصبر
في بير الخوف.. ونسيني
بقيت ميت بـ روح حية
بـ تضحك.. بس تعزيني
يا ليل ومالكش نهار
أنا اعتدت فيك المسار
شايل فوانيسي المطفية
وماشي بيها عكس التيار
مش محتاج من حد ضي
ولا باقي ع المشوار
أنا الحي اللي مات برضاه
عشان يصون.. سـر الانكسار
فتحى نجم
خاصه بالمسابقه قصيدة صرخه في حلق السكوت بالعاميه المصريه
01287711795 رقم الواتس
فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون
