حظك كده
كل اما تهرب م الوجع
تلقى القَدَر
عمال يغَيَّر في الأماكن والصور
تشرب ملوحة بحر ناسك
والعَجَب
من غير سبب
تلقى ناسك دول نَوَر
خُدلك شَوَر
وامسح في راسك
كل واحد م الغَجَر
حظك كده
تِسلَم من الطيب
ما تعيش
تعيش مع الأفلام
تطيش
خرابيش
كل الحوافر م البشر
حوالين همومك دول حَجَر
بارد يا بحر ملوش قرار
شطك بيحدف ليه مرار
وكإن فيه بينك وبينه
ألف جرح وألف تار
عينِك يا شارية ماليها حُزن
والحزن يمكن يبقى سجن
وكمان ما يمكن يبقى حضن
من كَسر حبة من البشر
سُكر يا ضحكة خدها
نغزتها هِربِت مِنَّها
ترسم خطوطها وقلبها
م اللحن دندن لَك وَتَر
حظك كده
تفرح تدوق طعم الجراح
تحزن يزيد الحزن ويل
تجرح ما تلقى ف يوم سماح
عايش حياتك حدف ليل
مالَك يا قلبي سكِت ليه
واقف وعايز تلقى حُب
مجروح وعايش دور وجع
عبدك يارب ساجد رَكَع
إرحم في جرحه ابعتله قلب
فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون
