مشهد الفراق
************
كان نفسها
تحكى لى ع اللى ف قلبها
وتقول لى ليه
نظرة عينيها اتغيرت
والدمع جارح خدها
لكنها
من خوفها ع اللى حبها
واللى مناه …يسمع لها
باعت ..كلامها.. لصمتها
واستسلمت
لدموع عينيها اللى ابتدت
تكتم ألمها ف قلبها
وانا جنبها
تايه مابين
ورد الخدود والدمعتين
وأنين جراح المظلومين
وكلام ..بيهرب منها
باصص على
شط الفراق اللى اترسم
بين نن عينى وحُسنها
وبصبر القلب اللى عاش
يحلم يبات
لو ليله واحده ف حضنها
لكنها
رافضه الايدين
تحضن ايديها وكفها
وكأنها
بتقول لى ده مش ذنبها
وانى اللي صار
غير مسار
سُفن الغرام فى بحرها
وانى الشموع اللى انطفت
م الصعب تعلن فرحها
*********************
رضا ابو الغيط
