إمتى ياصابرة ؟
**********
جمال الماضي مش راضي
يعود لينا
ولون الورد يا بلادي
معادينا
وانا والدنيا والايام
نقوم وننام
ودمع الحزن ف عينينا
لا راضى الحزن ينسانا
ولا راضية حياتنا تلين
تملى الدنيا وخدانا
لبحر غريق ملوش شطين
ورابطة الحبل ف ايدينا
بتوعدنا نعيش أصحاب
وتوعدنا نكون أحباب
فنفتح ف القلوب ابواب
لأحلام الهوى الكداب
وكاسه المُر يسقينا
لا شُفنا ف الحياة أفراح
ولا قادت ف بيتنا شموع
وطول الرحلة ما بنرتاح
ولا بتنسى خدودنا دموع
بتحصد لون أمانينا
فإمتى يا صابرة نتهنى
ونتغنى بربيع فرحان
بقلب جميل بيتمني
يودع دمعه والأحزان
ويبدر ورد حوالينا ؟؟
وامتى يا سمرة نتغنى
بلوحة تشبه الجنة
وريحة الفل والياسمين
تحني كفوفنا بالحٍنة
وتتمنى تداوينا ؟؟
********************
رضا أبو الغيط
