الرئيسية » مسابقة الشعر العامى » وحشتينى .مسابقة الشعر العامى بقلم / محمود ربيع عبد الحميد

وحشتينى .مسابقة الشعر العامى بقلم / محمود ربيع عبد الحميد

Spread the love

الشعر العامي
قصيدة (وحشتيني)
محمود ربيع عبدالحميد
…………………
يا مصر يا غاليه مشتاقلك
وحشتيني ومحتاجلك
تربيني علي يَـدِّك
تضميني وابوس خَدِّك
وحشتيني
يانور عيني
يا ست الحسن مين قَـدَّك
…………………
سنين محتاج تضميني
وتحكيلي كتير عنك
يا ست الحسن
ونا قلبي
رضيع شارب كاسات الحزن
وقلبي حَنّ لغيابك
انا المصلوب علي بابك
انا الواقف علي اعتابك
ومش قادر علي عتابك
وحشتيني يانور عيني
وحشني كل احبابك
………………….
وحشتيني….وحشتيني
ومستنيكي تحكيلي عن الشاطر
عن اللي كان في يوم شاطر
صبح خايب
عن الشايب … عن العايب
عن اللي خد كتير منا ولا إدّانا
عن اللي ف المهالك ياما ودّانا
عن المدفع ….عن الدانه
عن القمح اللي كان بادر اراضيكي
عن الشعب اللي باع عمره
وروحه لجل يرضيكي
وحشتيني يانور عيني
وحشني كل شئ فيكي
…………
وحشني
صوت ادان الفجر ف القلعه
وضحك صبيه بيجلجل
وهي مميله الزلعه
ورنة دق اجراسك
وليه هتحِنِي من تاني لحراسك
.ولفلولك. واتباعك
وكل اللي اكل خيرك
ووقت الشده راح باعك
قصاد عيني
يانور عيني
وحشني الحضن بدراعك
………………..
وحشتيني ……وحشتيني
ومحتاجلك تضميني
واقول يامصر مشتاقلك
وحشتيني ومحتاجلك
تربيني علي يَدَّك
تضميني وابوس خَدَّك
وحشتيني
يانور عيني
يا ست الحسن مين قَدَّك
………………….
محمود ربيع عبد الحميد
اسيوط _ديروط _ديروط الشريف
قصر ثقافة ديروط

تعليقات

تعليقات

عن همسه

همسة هى مجلة كل الناس وكل الأعمار . المهنية والصدق شعارنا .ننقل الخبر من مصدره الحقيقى ونسعى دوما للتجديد من أجل القارئ

شاهد أيضاً

رسالة من الغربة,مسابقة الشعر العامى,بقلم/صابر فرج ياسين على .مصر

Spread the love مسابقة الشعر العامي الأسم صابر فرج ياسين على ( جمهورية مصر العربية …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *