ط
مسابقة الشعر

خاص بمسابقة العامية (صندوق الحكاوى ) للشاعر / عمار الفار من مصر

الشاعر عمار الفار ==خاص بالمسابقه –شعر عاميه (صندوق الحكاوى )
============
راجع بلدنا بعد فتره من الغياب
من بعد ما ضهرى انحنى والشعر شاب
والشوارع تايهه عنى مش لاقيها
ومنين ايمم خطونى ترجع سراب
فين البيوت المدهوكين برماد وطين
فين السواقى والغيطان والفلاحين
فين الحكاوى المبدورين ورا كل باب
لما كان جدى بيحكيلنا حكاوى عالوجع…
يوصف لنا دمع الصبيه لما بيغيب الجدع
اوصف ياجدى وقولنا عن اللى ضاربين الودع
احكى باجدى وقولناعاللى حضر وعن اللى غاب
احكى يا جدى وقولنا على صفحه صفحه فى الكتاب
ياجدى انت وعدتنى انك هاتدينى الكتاب
—————————————-
ياحبايبى هاديكو الكتاب بس لما تكبروا
حكيتلى مره ان العبيد لو يركعوا
هما السبب ان الطغاه يتجبروا
اوعاك فى مره تنحنى
لاجل الجناه مهما افتروا
وغبت عنك كام سنه واتارينى طولت الغياب
والشوق واخدنى لسكتك والذكرى مليانه بعتاب
كل الجكاوى جوه منى معششين
لما كان شيخ الغفر مبسوط لظلم الفلاحين
اكمن فاديه البارود يخرس لسان المقهورين
يوقف النبض فقلوبهم يحنى الجباه المرفوعين
ينشف الدم فعروقهم
وهوه بيسيل من ضهورهم
بين ايدين الجلادين
والعيال يجيبوها تحضر
والاهالى معلقين
والقلوب ازاى هاتصبر
والعيون ازاى هاتقدر
يوم تعيش مش مكسورين
————————–
لسه صوتك جوه ودنى-لما كان لسه شباب
اوعه تنسى لاتعاودنى-اوعى تاخد عالغياب
جوه صندوق الحكاوى-باقى صفحه من الكتاب
ورجعت تانى بعد فتره من الغياب
من بعد ما ضهرى انحنى والشعر شاب
قابلنى صندوق الحكاوى
قال جى تدور عالكتاب
الكتاب ماهوش سطور جوه الورق
بس جدك كان الف صفحه من الكتاب
لكنه مات من سنين
وانت مسجون بالغياب
==============

admin

فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون

مقالات ذات صلة

زر الذهاب إلى الأعلى
Secured By miniOrange