خاص بمسابقة ( مجلة همسة )
قصيدة صندوق الذكريات.. ( قسم شعر العامية )
::::::::::::::::::::::::::::::::::::::::::::::::::::::
صندوق إزاز شفاف
مكشوف لكل البشر
كل الى فيه متشاف
والإسم لعبة قدر
………………. صندوق الذكريات ……………..
صندوق كبيـــــــر .. جداً أوى
مطوى وغطاه مش ملتوى
شايل معانى ملخبطه
متخبطه
وسط جدران الزمن .
مليان خيوط متلعبكه
متربطه
متباعه فيه من غير تمن .
وقفت أبيعها فى المزاد الى اتعلن
كراكيب قديمة مكسره مين قال نعم
رد الخواجه قال أنا
نطت شهامة فى العروق مع جدعنه .؟
طب خلى بالك … !!!! دى حالتها مدهوره؟
قالى فى بلاد الفرس راح يستنسخوك
ويعملوك 100 مسأله للعقول الذاكرة
دور فى نفسك ع الإجابه
بعت ليه صندوق حياتك ليه محيت الذاكرة .
وبدأت أدور ع السلالم والحيطان
وف كل ركن وكل قبه و100 مكان
مالقيتش غير خبط الغريب على الببان
دمعة مسافر ساب فى بيتنا كوم حنان
وصوره لامى معلقينها على المقام
صوت الزعيق والولولا جاى من عند الجيران
حبة ورق متبعترين ومحروقين
درجى الى كان شايل رسايلى والصور
كرسى الطفوله والبنادق والكور
عجلة قديمة مهكعه . ومتخلعه وبإدين جريد
كانت بتسند أخويا وقت . ما كان موظف بالبريد
اما الدبادب والأساور والدهب
ورق الهدايا والمعاطف والعلب.
ايام ماكنت فى شدتى وقت الصبى
كنت عاشق بنت حلوه من العرب
وأمرنى ابويا من حياتها أنسحب
وسحبت نفسى بعد حالة من الشغب
جانى فى بالى سؤال غريب فى وقتها
ليه الخواجه خد حجاتى وحبها
طليت بعينى على الحديقة المفرحه
لسه الحبال على العروق متمرجحه
لسه خيالى فوقها رايح جاى
لسه الأمانى لامحه فيا الضى
لسه الحصيره عليها قعدت جدتى
شايف ملايتى مقطعه ومتعفره
كل الحاجات متكسره ومتنتوره
فاكر مواقف مضحكة ع المصطبة
فاكر ساعات والناس فى حقى مخبطة
فاكر جنون . عطف الحنونع الأم
فاكر شباب حرر بلاد بالمرمطه والدم
كانت خطاوى الحلم فيا معلمه
جوايا ميت طفل حالته مؤلمه
حتى الكتب مش فاهمه قيمة علمها
مش عارف مين خط بقلامه فى سطره
مركونه جمب البياعين على كل سور
قالوا العمل . قولت العلام . قالوا يغور
بإختصار .. العمر طار والشمس لسه ماطلعتشى
بإختصار .. العمر طار والحلم لسه ماكملشى
قولت أبيع صندوق حياتى وذكرياتى
بس السؤال.؟
ليع الغريب الى اشترى وأهل العروبه ماشترتشى
“””””””””””””””””””””
بقلم الشاعر / طارق العجمى
مؤسس اتحاد شعراء مصر الأدبى
رئيس تحرير مجلة رؤية قلم
