ط
الشعر والأدب

قصيدة : لمى اللى باقى .. للشاعر / رضا أبو الغيط

لمي اللي باقي

من بواقي ضحكتك

وافتلي

من عزم صبرك 100 رباط

للأغبية

وبعزم ليلك شدي حيلك

واربطي

كل اللي كان

نفسه ومناه تتورطي

وف قعر نيلك احدفيه

من غير بكا

ومتزعليش

من نن عينك لما خاف

ف الوهم يوم تتشعبطي

لما رفض

يفتح ببان المضيفة

للمطرودين من أرضهم

والمحرومين من حلمهم

وبعلو صوت هز الجبال

قال للوضيع

الأرض دى مش ملككم

ولا ملكهم

الأرض دي

ملك اللي صانها وحبها

وف حضنها

دمه اللي عطر رملها

مش للي باع أرضه وسماه

واختار يتوه زي اللي تاه

وعشان دولار ساب الجدار

يخنق طموحها وحلمها

لمي اللي باقي

من خيوط شمس النهار

وابني لولادك ألف دار

وفنار بيهتف للعلم

بكرة يبان مين الجبان

ويبان لكل المُنصفين

مين انظلم

بكرة يبان

مين اللي كان نفسه ومناه

يطعن يا غالية ف سُمعتك

ويجر رجلك للغلط

ويورطك

ويغرقك

وتعيشي تاني تشتكي

دمعة عيونك للندم

وتمدي ايدك للخدم

******************”

رضا أبو الغيط

admin

فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون

مقالات ذات صلة

زر الذهاب إلى الأعلى
Secured By miniOrange