ط
مسابقات همسهمسابقة الشعر

ياثورتى..مسابقة العامية للشاعر / أيمن صبرى ابو عماد

… خاص بمسابقة الشعر العامى / الشاعر / أيمن صبري أبوعماد / صنصفط /منوف / مصر …

(ياثورتى)
خايف ياثورتى لتضيعى وسط الهموم
واللى قتل شعب يقولوا عليه مظلوم
والباطل يقولوا حق . والضلمة يقولوا نور
بلدى ياعطشانة عدل وضحكة المهموم

خايف ياثورتى تتوهى وتتوهينا
واللى زرعته بدمى ماتحصده أيادينا
خايف ياخدنا السراب ونضيع مابين حكاوينا
خايف ياثورة جيل كسّرحدود الخوف
نتوه وسط الدروب ويتوه مابينا الشوف
والليل اللى رحل يرجع والحق يعود مكسوف
خايف ياثورة كرامة على شط نهر النيل
خايف يعود الألم وتنطفى القناديل
خايف ياثورتى تضيعى من بين الأيادى
واللى رويته بدمى ما تحصديه يابلادى
خايف ياثورة ( يناير ) يسفّهوا أحلامى
دا العدل لسّه بيحْبٍى وبيشتريه مالى
خايف ياست ( هميس ) تقولى أنا الثورة
وفرعون يعود من تانى يقول أنا المولى
خايف ياحزب الضلال تنبت ومن تانى
وتنخر فى جسم الوطن يا حزب شيطانى
خايف يا شلة لصوص تلاتين سنة بتضل
أداوى جرحى فى (يونيو) ألاقى قلبى يعل
…..
آه يادى الوطن مستشري في أوصالى
تلاتين سنة مغصوب ما رحت عن بالى

معرفشى ليه ياوطن حبك بيسجنى
مهموم بعشقك أنا وتايه أنا فى حلمى

نفسي أفتّح عينى ألقاك جناين خُضر
ألقاك تسود الدنيا وتنسى السنين الغُبْر
وتقول للتاريخ ( أنا ) أنا منّى حتتعلّم
وطول مابيّه أمل الحق حيتكلّم
تقول للتاريخ أنا جبل وأهرامى عليّه شهود
وسدّى رمز الكرامة وجنودى خير جنود
وقلبي . قلب العروبة وحصنى حصن أسود
خايف يادى الوطن ياعمرى يامولود
خايف ياشعب عظيم حطم قيود الطوق
خايف أداوى جرح يشب غيره ألوف
خايف يتوه الحلم وأعيش أنا مكتوف
وبعد ما شفت النور أرجع أعيش مكفوف
والليل اللى رحل يرجع والحق يعود مكسوف

admin

فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون

مقالات ذات صلة

زر الذهاب إلى الأعلى
Secured By miniOrange