عندى ٱلام مستخبيه
وطن مزنوق في رئتينى
صدرى ضاق
ع الورد
والاغانى
والحب
الحياه بتلفظ أنفاسها الأخيرة
إزاى ماعرفتش أبنى من الصلصال
مدينه تحتوى الطيبين
إزاى ماعرفتش أتصاحب علي بنت تشبه
تحيه كاريوكا
جدعة
وعينيها واسعه
وذكيه
وإزاى الطيبين بتموت.
وكإن الحياه
بتحب تتعمر
وتستمر
بكتلة الأشرار
عندى ٱلام
تركها استعمار
اطفال حزانى
بنات مرعوبين من خبطه الباب
شباب ماتوا في الحرب
وشيوخ..انهكتهم التجربه
وطارت العصافير
وجف في عروقهم الخيال
نشفت عيونهم
اتحنط النخل فيها
فراش
أخضر الأشجار
اتحنط النهار
الطيبين بيرحلوا ورا بعض
مرعبة الارض
مااعرفش ليه الليله دى
وحشتنى امى
وكاتم عياطى بالعافية
(كلكم مشوهين بدرجات متفاوتة)
كلكم مرضى
جزام
تشوه نفسي
تشوه عقلي
تشوه أحلام
تشوه وطن
تشوه حب
تشوة قلب
كلكم أشرار
الطيبين بتموت وترتاح
من مسكة الجمره
م المؤامرة
ملحوظه لاصحابي المبشرين بالاوطان التعيسه
أنا….مش حزين
ولاعندى نية حزن متدارى
كل مافي الامر
هاجمتنى الام ساعه العصارى
فمارست حقي
بالغنا
والصريخ
الصريخ
والغنا
الغنا….الغنا ….الغنا
الصريخ …الصريخ …الصريخ
ودورت عليكى
لاقيتك…كل الألم
في الغنا والصريخ
كملت لك غنايا وصريخى
عياط متغنى
غنا بيعيط…..
