( حبة صبر محوج ) _____ رجلي خدتني لحد القهوه في نص الليل ماشي بعد خطاوي الليل بيعدي ازاي ماشي بشوف تفاصيل الشارع بالمجان رجلي خدتني لغاية أول ليلة شوق / على باب مقفول كنت ساعتها يدوب بتنفس حلم جديد أول مره اعد نجوم الليل بإرادتي أول مره اغير كل عوايدي عشانك واما وصلت لحد النجمه الأولى وضيك •• سرحت في ضلة وزحمه ووعد هو ازاي على قد القرب الهجر رفيق رجلي خدتني لحد وعودك سحبت الكرسي وخدت الناصيه الأولى تمام فقت يدوب على صوت بيقولي هتشرب إيه أشرب إيه ؟ اشرب ايه ؟ شارب يابني الغلب لحد طلوع الروح بس اقولك هاتلي قزازه عمر بسرعه أحسن عطشان هاتلي كمان كوبايه يدوب على قد الحلم وصب الذكرى يمكن اعيش اصل تعبت كتير من كتر اللف ورحت وقالوا مفيش ايوه بقولك عاوز حبة صبر محوّج بس تهدي النار وبراحتك مش مستعجل لسه بقيلي محطه يدوب اركب لليل قطر التفكير بص عليا الواد واتلبّك عمره يدوب حاجه وعشرين جابلي قزازه ميه وقالي ياخال كله يهون •• الا عذاب البعد وليله كنت ساعتها بالم سجايري وباخد نفسي الضايع مني/ معرفش منين وده ايه وازاي قلت اقولك هشرب شاي بقلمي ( احمد هلال )
