( وليــد ) ألف ليلة و ليلة عدِّت بعد ألف و ألف ليلة كلها ف الغربة مدِّت فى عذابى سنين طويلة بس راجع تانى آخد منكو دافع و العزيمة لاجل مارجع تانى جامد لاجل اجاهد لاجل ما تبقى حياتكم كلها عيشة كريمة عمرى كله ضاع ف رحلة بس راجع مش مهم الحزن اعيشه و المواجع مش مهم الدمعة تظهر ف المدامع أيوه راجع ( ساميـــة ) الف ليله وليله عدُّوا كلها كانت حزيـــنه كل ضحكه لو فى بُعْده بدارى بيها جراح أليمة قلبى راح يحيا بنبضه وانا جنبه م الليلادى هانسى أحزانى القديمة مش هاسيبك عنِّى تبعدْ وانا باوعد مش هاسيبك تانى ليله كل لحظه ليَّا جنبك سامعه فيها نبض قلبك تِحْيى أيامى الجميلة ( وليــد ) هوَّ شهر بس فيه هتعيشى عمرك إإمرينى يا أميرة تحت أمرك إيه اجيب لك نجمة عالية م السما ولَّا دُرِّة م البحور ولَّا قصر يليق بحسنك فى العلالى جوه سور ولا عقد بإيدى ناسجه من ضياكى يشع نور ولا غنوةْ حب أكتبها بنفسى تحكى عن سر اشتياقى تحكى عن بوحى و همسى أصل طول عمرى ف شوقك نفسى أصغر و ارجع اتقدم لابوكى و اطلبك و فْ إيدى مهر بس يا خسارة هسيبك أصلى راجع بعد شهر ( ساميــة ) بس شهر دى الدقيقه ف بعدى عنك عندى دَهْر لا وإيه راجع تقولى هو شهر بس برضو راضية بِيه و اللحظة فيه هتكون بعمرْ م الليلادى اطلب عينيَّه اؤمرنى أمرْ وهديِّتى حضنك يكون لى مخدتى وبغنوتى يحلا السهر أنا شايفه نفسى معاك عروسة وشبكتى كانت قمر والعقد ملضوم م النجوم جاى من ملاك مش م البشر لكنى عايشة كل يوم فِى غربتى وِفْ غربتك..والاقيك بعدت وارجع أعانى وحدتى و الغلطة كانت إنى سبتك يوم سافرت أنا مش هاسيب شمسك تغيب عن دنيتى مهما حاولت
(وليــد ) يعنى إيه ؟؟ ( ساميــة ) يعنى تقعد ما تسافرش ( وليــد ) طب و ليه ؟؟ ( ساميــة ) أصلى من غيرك ما اعيشّ ( وليــد ) مانتى عارفة كنت بامشى ف البلد ما ف جيبى قرش كنا نمشى وسط كل الناس عرايا و انتى عارفة الناس ياروحى بألف وش كنا بنكَمِّل عشانا نوم ف نوم و البشر حوالينا عايشة بألف كرش النهارده صرنا شئ و انتى جايَّة تقولى إقعد ما تسافرش لأ يا روحى ما افتكرش ( ساميــة ) متحاولش قلبى دايب من بعادك إنت إيه قلبك مادابش كنت باتغطى فى بردى جوَّا جِلْدى وادعى ربى لو ماخافش كنت بالمح فى عيون الناس مطامعْ يسألونى هو راجعْ .. أستخبى من عينيهم شوفت فيهم المدادى والمعادى واللى يكرهنى لـْعنادى أترعب واخد ولادى .. فْ حضنى صورتك ماتكسفش كنت احَفَّظْهم ف صورتك الغريب ابنى الصغير لما شافك يوم ماجيت قال ما اعرفكش التمن حرمان و غربة خوفى همِّى يبان عليه تقول ساعتها ما انفعكش قولتها وهاقولها تانى متحاولش ولَّا خليها سؤال كان ياريته متسألش ( وليــد ) طب و زادنا ؟؟ ( ساميــة ) ربنا يرزقنا بيه ( وليــد ) طب و مستقبل ولادنا ؟ ( ساميــة ) كل ده نقدر عليه ( وليــد ) طب حِلْمِنا ؟؟ ( ساميــة ) هنحققه لو مش ناسيه . دانتَ زادى و انت مستقبل ولادى وانت ضهر اسند عليه الأمان حسَّاه ف قربك أصلى طول عمرى بَحِبَّك و الحنان جنبى تلاقيه بس قول لى لما توحشنى عيونك مين يقولك لما حر الشمس يكوينى أنا فين هالقى ضِلَّك لما قلبى يتحرق مين راح يدلَّك لما جسمى يتوجع مين راح يعيننى لما روحى تطير لفوق فوق ف السما مين راح يشيلنى و الله مالى حد غيرك لم شملك و ارضى يوم ب اللى اتقسم لك ( وليــد ) كل دا شايلاه ف قَلْبِك يا حبيتى يبقى باقى عمرى جنبك لو ف عمرى باقى يوم يبقى ليكى لو سنة هاحياها بيكى إنتى شمعة عمر جَىْ ليل نهار بتشع ضَىْ إنتى فرحة باشتهيها إنتى سكة هالتقيها هارسمك فى ألف ليلة و اجدل الفرحة جِدِيلة تبقى توب العمر كلُّه ضحكته شوقه و ضلُّه هابقى حارس نور عيونك هابقى بسمة ف ليل شجونك هابقى عِزِّك هابقى دارك هابقى نجمة فى مدارك بس تِرْضِى بس عنى لما اقول لك إنِّى آسف لو جرحت ف يوم مشاعر أو ف يوم ع البعد قادر قلبى مؤمن بالقضا مش قلب كافر يا حبيبتى مش مسافر … مش مسافر
فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون
