خاص بمسابقة مهرجان همسة
فئة العامية
انثى تساوى 100 جدع
…………………………
ولأنها مخلوقة من ضلع الوجع
ولأنها عاشقة الجدع
وهبت حياتها لخدمته
كانت ابتسامة فى
عز لحظات الالم
كانت دفا
غزلت من الرمش الوفا
غرقت حياتهم
فى العسل الى منتهاه
الحلم صعب
لكنها
قادره تملى تبسطه
كانت له مصدر قوته
ولأنه كان عتره وجدع
كان ليها فارس
الدمعه لو زارت خدودها
يضمها ضمت حنان
القلب لو يوم اشتكى
يبقى الامان / لمسة ايديه
كانت عنيه
وكانت ابتسامة دنيته
رفض الزمان غير / انه يلعب لعبته
مات الجدع وسايب عياله فى حضنها
ولانها
انثى تساوى 100 جدع
ولأنها
شبعانه مين صدر امها
ولا الف حد يهزها
ولا الف حد يهدها
حلفت تحقق حلمهم
صبحت ابوهم وامهم
عبرت تضاريس الحياة على مرها
يا مؤمنه … يا ملهمه
يا معلمانا الوقفه فى وش الزمن
رفض الزمان انه عليهم يؤتمن
عمرك وجهدك
دمك وطهرك
كان تمن
مقدرش ابدا يدفعه
اعتى الرجال
يا هادمه من ضلع الوجع
كل المحال
يامبدعه فى صنع الرجال
مين بس يقدر يشكرك
فى زمن الرداءة والبدع
ولأنها مخلوقة من ضلع الوجع
فمكنش شيئ بيهمها
غير انها
انثى تساوى 100 جدع
منصور أحمد محمد عبد المقصود
الإسماعيلية…. مصر
فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون
