خاص بمسابقة مهرجان همسة الدولي
شعر العامية
بقلم/ حلمى قاسم على
محافظة قنا
“انت ازاى كده ؟ ! ”
*******************
على قد التعب الراقد جــواك
وعلى قد قساوة الدنيا وهَد الحيل
لكنك واقف زى الخيل
رهــــوان بتشق دروب الليل
ولا همك ايه آخر السكه
ولا همك طعم كاسات الويل
دايمــــــــاً بتقابل بالضحكه
حرمانك من اى حاجات
فى عيونك احاسيس ومشاعر
أحلام موصوله بخيط بكره
وحبة طلبـــــــــــات
وبرغم مطبــــــــات الأيام
وبرغم ضياعك فـ الأحلام
برضك بتمـــــــدد وتنام
جــــواك أفلام ابيض وإسود
للبطل العايش ع الهـــامش
متكلفت فى همومه وكامش
وتمر عليه احــــداث الفيلم
بيتغير وكإنه فـــــى علم
بتشدك أحــــــلام الفارس
مع إنك بتشــــــوفها خيال
حمّال لمشاكلك واوجاعك
مقبوله سمــــاتك وطباعك
أصلك إنســـــــــان
بتسيب التدابير ع الخالق
منتاش طمعــــــان
ولا ليك أحلام خارقه حدودك
ببساطه بترضى بمــوجودك
وعايشها بكل الألوان
وبرغم الحيره اللى فـــ وشك
وبرغم العوزه وضيق الإيد
عايش وكأنك طفل وليد
وبترسم ع السحنه الضحكه
إكمنك قال يعنى سعيد !!!
*****************
قلم/ حلمى قاسم
*******************
على قد التعب الراقد جــواك
قلم/ حلمى قاسم
