الجنة مش بنت وقمر. مسابقة الشعر العاى بقلم / بكرى جابر السيد.مصر

بكري جابر السبد
جمهورية مصر العربية
محافظة الفيوم
خاص بمسابقة مهرجان همسة الدولى للاداب والفنون
فئة شعر العامية
————————–
الجنة مش بنت وقمر
**
كيف الشجر
واقف لوحدك
و الرياح ….
بتمني نفسك بالمطر
حلمك بعيد
و الجدر راشق في العطش
محكوم عليك …
تفضل مع امبارح غريب
تبني مقامك من جريد النخل خوص
ريشة حب
ريشة من حزن النفوس
و ف كل ركنة تفتكر
وش لأبويا
وش ﻷبوك
كل الحاجات
رحال وشايل فوق كتافك الف ناي
واللحن طارح ع الوشوش
مشتاق تحل المسأله ؟!
و تحل سر الموت كمان ؟!
كان غيرك اشطر ياجدع
يا عم فوق
آدم و كان دايما حزين
والسر رفضه للحدود
و الشوق خطر
لم المﻻيكه جوه حجرك واختصر
في الفصل …. كنت وحدك ميت شيطان
رافض تكون زي العيال
و بتشرح النص اللي تاه بين السطور
لكن بليد
دايما بتكره الامتحان
دايما بتسقط يا عبيط
راكب حصانك جوه حاره مقفله كل البيوت
و الطبله من شعر الغزل
يا منتصر للي ماجاش
يا منهزم
ريح حصانك يا ابن بنت المستحيل
حملك فرط
عد الصحاب
وقولي :
ليك صاحب جدع ؟!
……
طب ليك حبيبه حنينه زي اللي في كتاب النصوص ؟!
……….
يا خص بوص فيك العيال دايما بتهرب م الطريق
يا قلب نيل
لكنه دايب م العطش
فاتح ضلوعك ألف خلوه
و ميت مقام
للي يزور أو يعتمر
لكن ما صلي حد ليك
بتقولي ليه :
كاس الغرام
ما عاد غرام ليه يا بشر …!!!
آهين و آآآه
يا لحن ناشف ع الوتر
قوم لم قلبك م الطريق
و ارقص على شط القمر
واكتب على باب الحياه
الحب موت
و الموت خلود
والعارفين دايما بتنده للربيع
والجنة …. مش بنت و قمر
الحنة … مش بنت وقمر