ط
الشعر والأدبمسابقات همسه

الفائز الأول فى العامية الشاعر / محمود وحيد من مصر

” رحلة النور”

الليلة ليلة ضى
والرحلة مشهودة
ميت يبارك حى
وإيدينه ممدودة
وقف البراق بالباب
مستنى نور الله
والروح على الأعتاب
نادى الحبيب حياه
قام النبى فرحان
والضى عدى مداه
وقف البراق سلم
اهلا يا ضى العين
اخرس بيتكلم
والبسمة ع الخدين
على فين كدا رايحين
والرد كان جواه
يا أشرف العالمين
رايح تشوف الله
الليلة لية طهر
للأرض ويا السما
وملايكة الرحمن
متزينين للقا
والاقصى ويا الحرم
بيرتلواالقران
والأنبياء واقفين
بيصلوا ع العدنان
دخل النبى قالوا
اهلا نبى الكون
يا نور عرش الله
بيك الرضا مضمون
قام النبى اتقدم
بإشارة من جبريل
صلى إمام بيهم
والعين دموع بتسيل
رتل ايات ربه
والكل قال ويـــاه
على سكته ودربه
بيرددوا ما تلاه
فاح المكان بالمسك
والبركة ساحة نور
والأنبياء إصطفوا
بدر ونجومه بدور
قالوا سلام يا نبى
ربك بعرشه ناداك
اركب براق السعد
طيب وطاب مسعاك
صعد النبى فى لحظة
والقلب كان ملهوف
مشتاق لوجه كريم
هيشوفوا ع المكشوف
اتفتحت الابــــواب
والكل مستنيه
اهل السما فى صفوف
والكل فرحان بيه
عرج النبى السبعة
والروح معاه فرحان
ولسدرة المنتهى
قالوا انت والرحمن
دورى خلاص انتهى
ما اقدرش اعدى الحد
وانت مقامك هنا
فوق كل حد وحد
حيا النبى مولاه
والمولى ضمه إليه
نور الإله غطاه
وأمر نصلى عليــه
يا اهل السما والارض
صلوا على المختار
دى صلاته سنة وفرض
بيها النجاة من النار
مين اللى ذى النبى
نال الشرف بلقــــاه
مين اللى شاف ربنا
يا موحدين بــــالله
المعجزة اتحققت
والرحلة مشهـــــودة
مكتوبة فى الالواح
فى قلوبنا موجــــودة
اسراء مع معراج
النور فى حضن النور
رب العباد والنبى
وجهين بدون مستور

الأول محمود وحيد

admin

فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون
زر الذهاب إلى الأعلى