ط
الشعر والأدب

اللى القمر عَمْه..بقلم الشاعرة / غادة الكاميليا

كاميليا كامل
——–

اللى القمر عَمْه

والنجمه تقرب لُه

الِلى الضيا منه

والغالى يرخص له

عَدّى على بالى

رمشه خطف شالى

أنا قلت له وماله

يخطف ما يحلاله

ما أنا من زمان عارفه

إنه الليلادى جاى

وب مية يمين حالفه

يشرب معايا الشاى

مَيّل فرد شالى

على ضل شجرايه

والليل وموالى

كان ضى قمرايه

وفضلنا نتقاسم

ضيف الهنا كان تمر

والبدر كان راسم

أجمل ليالى العمر

بسمه ف ضحكايه

ضحكه ف غنوايه

شقشق علينا الفجر

لملم طرف شالى

أنا قلت وانا مالى

ما لسه بدرى العُمر

طبطب على كتفى

مَلّس على شعرى

شال دمعه بداريها

جوه عيونى السُمر

فتحت أنا عيني

علشان أخبى ضياه

وأهرب انا منى

ف عينونه والننّى

وأجرى وأروح ويّاه

وأدى لعيونه علم

وياريت ما هاودتنى

ليه بس طاوعتنى

أصلّه يا ناس كان حلم

admin

فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون
زر الذهاب إلى الأعلى