الاسم : محمد أسامه أحمد المصرى
البلد : جمهورية مصر العربية
بريد الكترونى : [email protected]
نوع المشاركة : شعر العاميه المصريه
اسم القصيدة : ” الوصية ”
جدى كان تمانين سنة
وكُنت أسابقُه ..
يسبْقنى أنـا !!
عمرى ما شُفته تَعبان أو مِكشر
كان صُحابُه ..
الإبتسامة .. والغُنا
بس يُومهَا ..
من وسط كل اللى حاضر
ندهْلِى أنـا ..
أنا لسه فاكر
رغم السنين اللى فاتت
وبرغم إنى مكنتش كبير
كنت واعِى ..
إن جدى .. مُش بخير
الكل حواليه كان مدمع
والسرير كان البُكا
والصريخ ويا البُكا
همس فى ودنى .. قالى إسمع
إتمردت دمعة فى عينيا
مد إيده أوام مَسحها
قالى : مالك ؟ إبتسم
دا مِعاد أمانة .. لزماً هرجعها
عارف يا واد ..
الحاجة الوحيدة اللى وجعانى
قُولة يا جدو
معدتش هسمعها .. تانى
===================================================
غاب للحظة
قطع النفس ..
ورجعله تانى
لأجل ما يكمل كلامُه
إستاذن المُوت .. لو ثوانِى
لسْاك هنا ؟ ..
طبْ كويس
كان الفُراق مرّر فى صُوته
همسهُ أضعف مِن سكوتُه
عارِف يا وَاد ..
الدنيا قهوة ..
حاضنة الناس كُلها
زهر طَاولة .. يديك أوى
من غير سبب وتحس أنك قوى
فكرك خلاص ملكتها
الدنيا راح تكسفك
لو فِ يوم إحتاجتها
أوعالك تسلم روحك لها
كل ما تكعبل .. تقع
إسند على روحك .. إرفع راسك وقوم
خلى ثقتك بربك
دايماً أكبر مِ الهموم
===================================================
أوعاك يا واد .. تزعل أبوك
مهما قالك .. أو عملك
أوعى زعلك مِنُه ياخدك
دا برده إبنى
أبوك دا عِزك .. و إنت خيرُه
أوعى تنسى .. إنك كبيرُه
أمك كمان .. تكون جنبها
أوعاك تسيبها لوحدها
إنت إبنها .. خليها شايفة فيك حلمها
===================================================
سكت الكلام
دخل المَلك ..
ورمى السلام
الكل حوالينا إتسمر .. بيشاهد
أنا جدى غمض .. إبتسم .. و إتشاهد
بردت إيديه الدافية فى إيديا
ضاقت حيطان البيت عليا
حفرت دموع الفُرقة شقوق
رسم الوصية طريق .. وشروق
أدى واجبه .. و بأمانة
سلم للأرض جسمه ..
و روحه فضلِت معانا
أما أنا ..
من يومها ولحد النهاردة
لسه مؤمن إن دا .. مش أخر لُقانا
وفى كل جمعة
بروح أزروه .. وأبتسم
وأتمنى يسمع دُعايا
أنا جدى قالوا أنه مات من كام سنة
لكنه لسه .. عايش معايا
لكنه لسه .. عايش معايا
