شعر العاميه النص بعنوان
بميزان الاخلاق
شوف الشمس وشوف القمرة
وشوف النايم تحت الشجرة
شوف المالى عينيه بالفرحة
واللى عيونها ماليها الحسرة
شوف واتعلم فين تتكلم
وازاى يبقى سكوتك عبرة
لكن قبل وبعد ده كله
لازم تفهم معنى الفكرة
تفهم أن انا وانت اتنين
وغيرنا فيها كتير ملايين
عايشين فرح وعايشين جرح
ويمكن زينا مش عايشين
مااحنا لاموتنا كموت الناس
ولا لحياتنا كغيرنا دليل
لكن قبل وبعد ده كله
لازم نعرف ايه عايزين
عايزين نبقى شيء ملموس
رغم عذابه بيدى دروس
ولا رضينا بايدنا علينا
نجنى وعلي أحلامنا ندوس
قالوا كل محال منذال
لو فى جيوبك تل فلوس
لكن قبل وبعد ده كله
لازم نوزن اى نفوس
لازم بميزان الاخلاق
نوزن اى نفوس حوالينا
علشان نعرف ايه راح يدوا
واحنا هندى وايه ادينا
الإنسان بعطاءه كيان
اد المحن فى أى مدينة
لكن لازم قبل ده كله
فى كيانك يبقى لك مينا
أمل عبدالفتاح قطب
من مصر
فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون
