جنازة قمر
الخوف ساعتها شم ريحتى
فــ انتفض
يغرس ضوافره فــ جتتى
و يمص فيها ع المزاج
الروح … زجاج
و الشرخ فيه باين أوى
و شويه لو ايه بصلى
أو ديب عوا
الشرخ ممكن يتسع
و فــ لحظه جايز اتكسر
و ربما
لو ده الكابوس طال مش هاقوم
ما البوم
تمادى فــ انتباهه للسما
أما الغراب
دب منقاره فـــ وش الأرض يعلن للجميع قبل الأوان
موت القمر
و ان النجوم
طالعه بجنازه من زمان
و ان الشجر آسف
و الصخر بيعدد
و البحر رتل سوره كامله للفراق
الكون خواء
و أنا وحدى برقص م العذاب
و بنزها الأحزان
بدم
……………………بقلم علا جوده
