حبيت في يوم ..قصيدة للشاعر / عمرو المليجى

. ” حبيت في يوم ” ..
……………………..….

جرّبت اسافر واهجُرك
ما هَجرتكيش 
حبّيت في يوم ان اكرهك
ما كْرهْتكيش 
قُربِك ما فيش .. 
هجرك ما فيش ، كُرْهك ما فيش
كل احتمال ، شبَه المُحال
ما بينتهيش ، إلا بـ ما فيش
فكرهت صبري اللي اختفى
وكْرهت عمري اللي انطفى
وكْرهت من بين الكلام 
كلمة .. ما فيش
طبْ اعمل ايه .. 
طب اعمل ايه ، ساعة العطش
وازاي اعيش 
طب اعمل ايه من غير لقا 
والروح ما فيش
هو انتي ايه 
زيّ الزّمن .. ما بترجعيش
والّا انتي عايشه في السحاب 
زي المطر .. ما بتنزليش 
والّا انتي خدعه للعينين
زي السّراب .. أصلا ما فيش
آن الآوان ان احسبك
زي الوجع .. ما بينتهيش 
واتعلم الحُب الجديد
ان اللي يقدر على العطش 
يمكن يعيش 
ويلاقي في قلبِك مكان
او ما يلقيش 

……….. شعر ……….. 
.. ” عمرو المليجي ” ..