حلم بجناح اخضر
——————
هيا .. بهية .. شقية
رقيقة .. عفية
حُرة .. ابية
تبان بنوتة صغيورة
ترسم حلم بجناح اخضر
كما العصفورة
لكن من خوفها تشوف جناحاته
تملي حزينة و مكسورة
بتغزل حلمها جوة الشمس
تداري الخوف في كهوف الهمس
ويا خجلها تغزل منه
جدايل عتمة تخبى الأنة
ماهي مش فاهمة عشان عصفورة
***
بنت تدور عـ الحرية بعفاف
حلم تعيشه رقيق … هفاف
تتوه في الزحمة
من غير رحمة
ويا خلاف
تسأل روحها
ليه الحلم تملي يخاف
يظهر جوة براح طواف
هيا الدنيا خِلف خلاف ؟
و الا ما فاهمة أيُها حاجة ؟
كمان محتاجة
تلملم فكرتها المطيورة
***
و كمان تعشق زي كبار
همسها سحر كما الاعصار
تشوفها تقول ديا يادوب
ضحكة فـ غنوة او فزورة
هيا شقية زي عيال
تجري ما تهدى ليالي طوال
تتعب …. تنهج
تهدى .. و تخرج
تاني .. لجل
ما تلعب كالاطفال
اصلها لَقطة بسيطة فـ صورة
***
تعمل ايه في شعور جبار
دا الاحساس نعمة و اسرار
نعمة من رب الاخيار
وهبها حكمة برغم عذابها
وهبها كمان ربيع دوار
يدور على قلب العاشق
يمسح دمعة سُهده الراشق
في قلب ملاه حب و افكار
هيا البنت و دي حكايتها
تزرع حب عشان شطورة
***
وش ماليه ضحكة رقيقة
تشوفها بريئة
ساعات و جريئة
لكنها رغم العمر الحاير
تعيش في طفولت
بنت وليدة صغيورة
لما الحب يخبط بابها
تزيد اسبابها
تِعد حِرابها
لجل تدافع بقوة مهولة
كانها غولة
وقعت جوة شراك مغزولة
نفسها تهرب بكل سهولة
تلاقي سهام الحب تصيبها
ويا حبيبها
حنينها و شوقها
يلون شط النهر السابح
بسواد مالح
جوة عيونها المقهورة
***
بنت تنادي بكل حماس
فين الرحمة و الاخلاص
بلاش من غيرة .. تِهد
عشق بينزف نبض
و يعزف فرح يا اغلى الناس
ليه الدمعة جواها سابحة
دايما طارحة
في ليل متغطي بحماس
لما سواقي الشوق
بتناجي ويا شادوف
تدور عـ الاخلاص فـ البير
يطَّلع من جواها الخوف
ما تلقى الا ديابة بتنهش
قلب غزالة كان ملهوف
زيها بردو عـ الاشواق
ترجع تاني جوة قفصها
المبني بحزم في حضن جفاءها
برغم حنانها تبان مغرورة
بقلم
سعاد عبد السلام
