زهق
شعر / احمد محمد زايد
يوم زهقت وغلبى بان
واتذكرت ايام زمان
لما كان بيتنا الكبير
حبه ينضح ع الجيران
ليل نهار الفرح فيه
كان زياده وكان كافيه
واما وقت الليل بيجى
كنت أقيده بشمعدان
والشجر كان فى المقابل
فى الصباح يطرح بلابل
والثمار تطرح غنا
والشيطان ماكانش يجرؤ
يوم يهوب عندنا
او يخبط ع البيبان
او يقرب مننا
ولا يهمس فى الودان
بيت خلاف كل البيوت
حى مش ممكن يموت
كل يوم فيه الشجر
ع اللى ماشى يهز توت
والثمار تنزل علينا
كان يفتح نور عينينا
ع اللى جاى وعلى اللى راح
انما جات السفن
عكس مابتيجى الرياح
والكروش صبحت قروش
والجيوب حملت سفاح
واللغات اتبرجلت
والكلام على بعضه ساح
واكتفينا بالمواعظ
م اللى همه يبيع سلاح
والقلوب عبت هموم
والعيون طرحت نواح
لما هملنا السبب
بس لومنا على الجراح
المؤلف / احمد محمدزايد
فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون
