قصيدة : خط الغربة .مسابقة الشعر العامي بقلم / سلوى مصباح أحمد

* وفين محمد ابن عم عماد ؟

_ ده في اليونان بيلِم بخته هناك

* وفين خليفة وفين أمير وهشام ؟

_ دول هاجروا يابني كندا من أيام

* هاجروا !!

* هاجروا وسابوا القهوة دي مع مين ؟

والحاجة عفت مين يراعيها ؟

_ قبل أما يمشوا اتطمنوا عليها

ودوها أغلي رعاية للعواجيز

الدنيا يابني ماعدش فيها عزيز

والقهوة دي مابقتش قهوتهم

باعوها لجل يروحوا غُربتهم

وخدها منهم ابن عم أمين

* آه ه ه

_ معلش يابني العمر حَكيُه حزين

دي الدمعة ساكنة وضحكنا حايشها

طب فين أميرة ..

طب فين أميرة يا شيخنا … تعرفها ؟

_ قصدك أميرة بنت الأسطي حسين ؟

دي اتسترت وف بيتها من سنتين

* آه آه

_ مالك ياولدِي في شئ بيوجع فيك ؟

حاسس بإن الدنيا ضاقت بيك

هو انت احمد ؟

هو إنت أحمد ابن عم فؤاد؟

_ سمعت عنك قالوا في الإمارات

خِيرة شباب الحتة والجيرة

سافر عشان يتهني بأميرة

_ حكاويكوا يابني مصاحبة كل لسان

أساميكوا لسه عالبيبان والحيط

باين عليك الخضة ليه وبهتان ؟

طيب زيادة .. معلش يعني عبيط

_ زعلت يابني وماشي وسايبني

أنا زي أبوك معلش اسمعني

– طب روح لأهلك يابني يلا سلام

ولينا بُكره أكيد بواقي كلام

* ماليش في بُكره أنا أي حدوتة

أنا ماشي راجع من مكان مانا جِيت

خلصت خلاص القصة توتة توتة

ولافي أميرة ولاصحاب ولا بيت

_ إوعاك لاتخسر باقي بُكره الجاي

خليك في بلدك ده الزمن نساي

* أنا كنت راجع ألم في أصحابي

وأحضن في ماضي قلوبنا من تاني

علي بيت حبيبتي وأخدها علي بيتي

وأقول لأبوها ده مهرها الغالي

مش قادر أنسي لحظة ضحكتها

من يوم ماقالت هاتلي فستاني

_ معلش يابني الدنيا مُش بالكِيف

عَدِي اللي عَدَي كأنه صحوِة صيف

قوم فَرَّح أُمك كُلْ معاها الزاد

واحضُن أبوك وماتسافرش بلاد

* أنا قبل ماأمشي بس ليا سؤال

هو إنت مين ؟ أنا ماعرفكش ياخال؟

_ أنا يابني عمك مجدي أبو عمران

اكيد سمعت حكاوي عني زمان؟

* سمعت عنك يَاما في طفولتي

قالوا ده هج لدُنية الخواجات

قالوا مِضَيَع عُمرُه في الغربة

ولا لِيه ونيس ولاحتي حِتِة واد

_ ورجعت يابني والفؤاد مكسور

والشعر شايب والسنان وقعين

ماتعودش يابني لغربتك تاني

دور في قلبك لسه ناس غاليين