**************
ليه علينا الليل بيطول
والنَّهار مالوش عينين
وامَّا صورة الحلم تكبر
نصحى منه مفزوعين
نلقى لون الضحكة أصفر
لون صفار الميِّتين
قلنا لمَّا الشعب كبَّر
مش هيرجع يوم حزين
واللى داق الظلم يقدر
يحمى حق المظلومين
وان عمره ف يوم مايُغدُر
باللى حلفوا معاه يمين
ليه يسيب السوس بيُنخُر
جوه عضم الشقيانين
ضلمة..زحمة..فقر يكسر
ضهر كل المطحونين
خلُّوا شكل الدنيا يصغر
نعمى واحنا مفتحين
احنا كناَّ زمان بنصبر
لجل بشرى الصَّابرين
بس كتر الصبر فجَّر
جوه منا مرار سنين
مين هايهرب م المقدَّر
اللى مكتوب ع الجبين
إن الشعب ف يوم يطهَّر
مصر أرض المرسلين
يومها صوت الحق يظهر
هو ده النصر المبين
يعلى صوتنا ف أعلى منبر
ادخلوها آمنين..ادخلوها آمنين
