** – صرخة مُعَلِمْ – ** ( بمناسبة عيد العمال مايو 2018 )
أنا اللي عاشقك يا مصر
و طول عمري خدامك .
معرفش غير حُضنك
ضميني ف أحضانك .
شايل بقالي سنين
الهم فوق راسي .
لجل النبي حِسي
راعي حساسي .
أنا باني الأجيال
ليه يا أمه نسياني .
أنا ليه ح أقول و أعيد
طاب م إنتي عرفاني .
تلاتين سنة شغال
يا أغلى ما عندي .
ب أبني جيل ورا جيل
و أنا طافح الدردي .
إوعي تقولي يا أُمي
م إنتوا ب تدوا دروس .
واحد ب يدي صحيح
و تُلتميت منحوس .
حِني عليَّ يا مصر
د إنتي يا غالية أُمي .
و لمين أنا ح أشتكي
لما يزيد هَمي .
بالله عليكي يا مصر
حِسي ب وجودي .
قربت أشق الهدوم
و ألطم على خدودي .
كل إللي سمعوا صرختي
قالوا ملوش لازمة .
إمشي جنب الحيط
في البُق ميت جزمة .
للسجن راح يا خدوك
منتش ناقص أزمة .
يا ناس و ربي حرام
حد عليَّ يلوم .
ليه بس ت لوموني
على صرخة المظلوم .
يا خلق هووووه ب أصرخ
إسمعوا كويس .
يا مين يوصل صرختي
لسيادة الريس .
بقلبي و قلمي في 29 / 4 / 2018
الشاعر / محمد رمضان
