طريقة عمل جناش او صوص الشيكولاتة للشيف المبدع / حمادة ميدو

لتزيين التورتات او الحلويات عموما و كتير منكم بيشتكى انة الصوص بيطلع معاها جامد و بينشف و الشيكولاتة بتبقى جامدة و بتتكسر مش بتبقى كريمى

اول و اهم حاجة فى نجاح جناش الشيكولاتة هو استخدام نوع شيكولاتة جيد سواء كانت شيكولاتة خام او بالحليب و اللى بيفرق فى الاتنين فى عمل الجناش هو ان الشيكولاتة اللى بالحليب بتكون اصلا بطبعها كريمى لما بتسيح مش بترجع تنشف و تمسكتانى زى الخام لان الخام مفهاش سكر ولا حليب فعشان كدا لما بتسيح بعد شوية بلاقيها بتجمد و تتكسر

الشيكولاتة بالحليب بيكون فيها سكر اساسى فلو هنعمل الجناش بشيكولاتة بالحليب مش بنحط سكر

الشيكولاتة الخام لازم طبعا نحط فيها سكر و يكون سكر بودر

لو عاوزين الجناش خفيف لية طريقة و لو عاوزين تقيل و كريمى عشان الحشو لية طريقة الاتنين مختلفين و هقولكم الطريقتين دلوقت

نوع الزبدة المستخدم فى الجناش يفضل انة يكون نوع معروف زى زبدة لورباك لان نسبة الحليب فيها بتساعد على ان الشيكولاتة مترجع

طريقة عمل الصوص الخفيف:

200 جرام شيكولاتة خام
من ربع الى نصف كوب سكر بودر حسب الذوق
3 ملاعق كبيرة زبدة لورباك
كوب كريمة خفق سائلة ( كريمة خفق جهينة للحلويات الحجم الصغير اللى هو ربع كيلو)
ملعقة صغيرة عسل نحل.

الطريقة:

نسيح الشيكولاتة الخام على حمام بخار مائى مع الزبدة و ملعقتين فقط من الحليب السائل

فى كسارولا على نار هادئة نضع الكريمة والسكر و نقلب جيداا واول ما الشيكولاتة تسيح نضيفها للكريمة و نقلب 5 دقايق او لحد ما نلاحظ ان الصوص بدأ يتقل قليلا و اخر شىء نضع العسل و بس خلاص نرفع الصوص من على النار و نصبة فى بولة و نضعة فى التلاجة لحين الاستخدام.

ملحوظة:

لو هنستخدم شيكولاتة بالحليب بنعمل نفس الخطوات بالظبط بس زى ما قولت مش بنحط سكر و لا زبدة ولا حليب يعنى بنسيح الشكيولاتة علطول لوحدها على حمام بخار مائى و نضيفها للكريمة و العسل.

طريقة عمل جناش الشيكولاتة الكريمى لحشو التورتات:

200 جرام شيكولاتة خام
من ربع الى نصف كوب سكر بودر حسب الذوق
ربع كيلو كريمة شانتة بودر
كوب حليب سائل.

الطريقة:

نسيح الشيكولاتة الخام على حمام بخار مائى مع ملعقتين فقط من الحليب السائل

نيجى بقى لطريقة عمل الكريمة شانتية البودر (انا بجيب السايب من محلات بيع مستلومات الحلوانى و الربع كيلو بيكفى لحشو وتزيين تورتة مقاس 24 )
(ناخد بالنا ان فى كريمة شانيتة بيكون بودر خام و فى بيكون بالسكر انا اديما بيجب الخام عشان اتحكم فى مذاق الحلاوة براحتى و حسب ما بنحب)

اهم حاجة اول ما نشترى الكريمة البودر نحطها فى التلاجة ليلة كاملة فى الرف اللى تحت الفريزر علطول)

الحليب المستخدم لخفق الكريمة لازم يكون ساااااااااقع جدا
الربع كيلو بياخد كوب حليب

السكر لازم يكون بودر و بأكد تانى لان مهم جداا

نخفق الكريمة طبعا عادى و بعدين نضيف ليها الشيكولاتة بع ما تكون ساحت و بعدين نخفق تانى و نضعها فى الفريزر ترتاح حاولى ساعة

و بس كدا و نستخدماها عادى للحشو و للتزيين.

وبالصحة والهنا …