قصيدة : أما بعد .مسابقة الشعر العامى بقلم / محمد طاهر

أما بعد
******
ما عادتش في قلب غير دقة
بصوت مبحوح
وأوضة وصالة مفتوحة
و من غير روح
وشق عريض علي جداره
بيلفحني منين مابروح
وسقف بينشع الماضي
وكله جروح
ولون الفرش مِية بقعة
ومش بتروح
نسايج باهتة وبتنزف
بخيط مسفوح
ودقة تزق باب الموت
عشان يفتح
فتجري الروح
أشوف نفسي كما غيري
ما بيشوفني
عيوب وحاجات
كتير تانية بتكسفني
وإبرة خيط بتلضمني
بدمعي وكسرتي و همي
وستر العورة
تبقي قماشته من ذمي
صحيح أنا مُت ؟
ولا الموت ماجاش جنبي
#محمد_طاهر