الله عليك يا ابن بلدنا
يا أبو عِمة وشال
وانت بتحفر ف الصحرا
مِروة وحوال
علشان تعدي لنا المية
من وسط جبال
وتبل ريق زرع هيطرح
للناس أموال
الله عليك وانت بتزرع
قمحك بإيديك
ومعاك ولادك والفرحة
بتطوف حواليك
وبتدعي ربك يبارك لك
وكمان يعطيك
بستان من الحُب الصافي
والصحة العال
الله عليك يا ابو فاس صاحية
ليل ويا نهار
ومخلة بتحزم وسطك
بين الأنفار
وانت بتبدر أمانينا
ف الغيط والدار
وتقول يا شمس يا شموسة
مش وقت جدال
آن الأوان نزرع فيها
ورد وياسمين
ونزود الرقعة الخضرا
حبة فدادين
علشان ولادنا تعيش فيها
أيام وسنين
وتقول لكل البشرية
اليأس مُحال
*********************
