قصيدة : استناني . مسابقة الشعر العامي بقلم / عماد محمود خليل

قصيدة بالعامية المصرية بعنوان ” استنّاني “

استنّاني..

كلمة بنِسْمَعها كَرِجّالة ومنها أكيد كُلّنا بِنعاني

قال يعني الست المصرية ..كات لسة كمان مستنّية

ييجي الهضبة يقول براحتها قُدّام مرايتها ف أغنية

وبرضه تقولك استناني.. هَجهز وابقى معاك في ثواني

استناني…

أيوة ألو.. يانا يا هو..

بَرِنّ كمان عالرّقم التّاني استعجل فيها..

يلّا زِهقْت ..

ترُد عليّا خلاص خلّصت…

هسَرّح بنّوتّك في ثواني

استناني..

ممكن أنام وأصحَى وأنام تاني..

وأحلم بيها ..

لسّة الطّرحة بتُظْبُط فيها..

أقولّها يلّا..

تقولّي استنّى.. نسِيت ولِبسْت شيميز لون تاني

استناني..

قاعِد أَزمّر في العربية..

ترد عليّا من البلكونة والنّبي جايّة …

ماشي يا ستّ انتي يا مجنونة أستَنّى شويةّ

ومفيش فايدة.. أزمّر تاني..

تقولّي خلاص واللهِ ثواني

استناني…

بقلم

#عماد_محمود_خليل