الاسم : وليد عبد الجواد رمضان
اسم الشهرة : وليد جودة علي
الدولة : مصر
أرقام التواصل :
01064222456
01225422212
رابط صفحة الفيس بوك /
https://www.facebook.com/share/1CoXkJYgUv/
(البوسطجي)
كان أسمر زي ولاد الشمس
ووشه بشوش
كان يقرأ أي جواب باللمس
ما يفتحهوش
كان بالإحساس يعرف فحواه
وما يفضحهوش
درويش في محبة خلق الله
بيوزّع نوره على الماشيين
وبيبدر في قلوبهم عنبر
كان رغم الشيبة نبات أخضر
كان قلبه وسيع حجم السماوات
وعنيه كوثر
كان حافظ كل هموم الناس
وناقشها ف روح عينه الدفتر
كان يصحى الفجر يسوّي النور
ويرصّ الحب في قلبه صاجات
ويرش على الجوابات سكّر
كان أجدر واحد يوصف فرحة أم في ريف
إن جالها جواب من ابن مسافر ف البندر
كان عارف إن الفرقة عذاب
وإن ابنها مات
فدّاها بروحه جواب كدّاب
ما رضيش يحرمها من الجوابات
” إزيك يا أمّه وكِيف الحال ؟
وحشاني وواحشني صباحك
إن شاء الله تكوني ف صحة وعال
منصورة عيونك وضواحك
سامحيني يا غالية علي الغيبة
الغربة بتطرح في جبيني عناقيد أحزان
والدنيا بتخدع ومُريبة
سامحيني عشان أرجع إنسان “
كان طول الليل يعزف ألحان
ويغنّي آمال الناس حواديت
أوتاره بتشنق في الأحزان
وتوصّل فرح يتيم للبيت
عن ست بنات والأب غياب
ودا عاشر شهر مفيش أخبار
لو بس يجيلهم منه جواب
هيزيح الهم ويطفي النار
عن أرض صاحبها فارقها وراح
والبنك بعت إنذار واتنين
بقى طرحها كله شجن وجراح
مش عارفة هتدفع فين ومنين
عن بنت عيونها بتستناه
أو حتى يجليها جواب منّه
من يوم ما أتجنّد قلبها تاه
خدوا عينها وحجبوا النور عنّه
والواد السارح في الأيام
دبحاه البنت كحيلة الطرف
مش عارف يكتب أي كلام
قام باعت قلبه في قلب الظرف
وحكاوي كتير بتشاركه الليل
وتزيد من حيرته وتفكيره
يتمنّى يلاقى لروحه دليل
أو إنه يكون مخلوق غيره
يتمنّى يكون مثلا عصفور
أو غيمة بتهمي وترمي سلام
فتحبّل كل الأرض البور
أو شمس بتضحك للأيام
وتعبّي قلوب الناس بالنور
وأماني كتير من أجل الغير
بتطير جوّاه من غير جناحات
يتمنّى يكون مثلًا هدهد
بيجيب أخبار مسقيّة يقين
ويهدهد قلب الست بنات
أو كنز يكون مدفون في الأرض
فصاحبها يعود ويسد القرض
يسقيها دموع تطرح ضحكات
أو راديو أمين
بيذيع إعلان عن وقف الحرب
فيوقّف ضرب في قلب البنت
ويجمّع بينهم بعد شتات
أو وردة تكون مرسال للواد
وتفيض في الشرح وما تخبّيش
وتكون لمشاعره دليل إثبات
كان سورة ( خير ) بترتلها كل الفراشات
كان زي الطيف
كان وحي بينزل بالجوابات
وككل رسول …
الناس بتميل وبتزرع خوف
عصيانهم خد من روحه راقات
من يوم ما اخترعوا الواتس الزيف
الناس نسيوه
قتلوه بالشات
فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون
