ط
مسابقة الشعر العامى

قصيدة : الف إيد . مسابقة الشعر العامي بقلم / وسيم عبد الخالق

وسيم عبد الخالق
الإسكندرية
https://www.facebook.com/waseem.abdelkhalek.75?mibextid=ZbWKwL
01095040730
شعر عامية

( الف إيد )
بصيت لايدي باستغراب
مستني تنطق بالجواب
لسؤال جوايا له مدة
ليه كل واحد مننا
إيده بتفرق عننا
مع ان خلقة ربنا
شكل الايدين واحدة ؟؟

قالوا عن واحد نفوذه
جاعل ايديه طايلة
والتاني لو تعوزه
للخير ايديه شايلة
و ده إيده من طولها
تاكل مال اليتيم
و ده له ايدين بيضا
عايش بقلب سليم

و ده مخه فدراعه
وايديه تمللي ف أذىَ
و ده جِلدة على قرشه
مدة ايديه معجزة
و ده إيده متشققة بيحبها الرحمن
و ده إيده متنعمة شايفة الدلع الوان
و ده إيده كتّابة عايش بيتعلم
و ده إيده كدّابة بالنصب تتكلم
و ده إيده ف المية رايق كدة تلاقيه
و ده إيده مخرومة عايش حياته سفيه
و ده خيبته بترجعه
ورا ايد و ايد قدام
و ده بحطة ايديك
مكان ما سيبته ينام
و ده إيده على قلبه
عايش شعاره الخوف
و ده إيده على كتفك
سندك ف اي ظروف
و ده إيده متشحتفة
عايش حياته سؤال
و ده إيده متكتفة
عاجز و خانقه الحال

بس الايدين كلها
ممدودة ليك يا كريم
بخيرها و بشرّها
طمعاً ف رب عظيم
انت الغني عننا
فقري إليك تعظيم
اما نوايا الإيد فأنت اللي بس عليم

admin

فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون
زر الذهاب إلى الأعلى