قصيدة (الموت) مسابقة الشعر العامى بقلم / حسام خالد

الاسم : حسام خالد
الدوله : مصر – محافظة الجيزة
الفئه : شعر عاميه
اسم القصيده : الموت
Facebook : https://www.facebook.com/7ossam.khaled20
Phone – whats app : 01270912615
عزيزتي حبيبتي أزيك
وحشتيني .. أيه الاخبار
صورتك في عيني ليل ونهار
مرايتك زي ما أتسابت بنفس الكسر
موبايلك لسه ماتسجلش وماتشلش
في صوت جوايا بيقولي هترجعلك
وماتخفش ..
هدومك لسه بتدفي مع الآحضان
ولسه عنيا بتخوني وبتدمع
كتير وصفولي مرضي جنون
مفيش ميت في يوم يرجع
ولسه بحب فستانك ..
ولسه الدبله في أيديا
وبرفاني اللي بتحبيه ..
ولسه سجايري مابتخلصش
وسامعك وأنتي بتقولي
كفايه صحتك هضيع ماتستهترش
وبعذر كل واحد عني بعيد ..
محدش شاف حنانك يوم
محدش شاف جمال روحك
هنرجع صح ؟
وهتيجي تطمني روحك
وأشرب قهوه من أيدك
نصلي الفجر تدعيلي
وأجيب المصحف الدهبي ونقرا ياسين
وندعي بعض بالجنه تقولي أمين
ونوعد بعض مش هنروح
مكان الآ وأيدينا في بعض
سبقتي حبيبتي على الجنه
وسيبتيني بموت في البُعد
قالولي كل داء بيروح ..
وتنسى الماضي عادي هوا
فـ قلت مريض بضحكتها ..
وماليش في الدنيا غيرها دوا
–
وأدم خلاص كبر ..
وفي المدرسه دلوقت
بيقولي فين ماما ؟!
فـ بقوله رجعلنا
بيسألني ليه سايبانا طول الوقت
فـ أقوله عشان موجوده في الجنه ..
فـ يقولي نفسي في حضن
ويكون كمان منها
فـ أسكت وماتكلمش
يعند ويبكي دموع ..
ويقولي عايزنها
فـ أسكت وأطبطبلُه ..
على ضهره لآجل ينام
معلش أكيد بكرا هنشوفها ونزورها
روح يلا لسريرك ماتسبش حضن هشام
ويسيبني للوحده
وصورتنا والفستان
صوتك بيندهلي
موجود في كل مكان
يا بنت قلب الليل
وحشاني محتاجك
يا ورده من غيرها
أيه لازمة البُستان
شوفت كل الوجع
وصاحبت طبع الـ آه
شكيت لحضن السما
وسألت عنها الله
لفيت بلاد الخلق
ملقتش منك زيي
وولادنا أيه ذنبهم
يتيتموا منك
كل اللي نفسنا فيه
نلقى بوجودك ضي
أو نلمحك علشان والله بنحبك
–
الدبله في أيديا
وهتموت مع موتي
والحضن من قلبك
لساه بيمضي غياب
يا حُب دون تكرار
عمري ما اشوف غيرك
أنتي الجواب والسبب
لو كترت الاسباب
مكتوم في قلبي القول
عشان ماهوش ليكي
وأية لازمة الاشعار
لو يوم موصفتكيش
مابشوفش غير صبرك
ودفاكي وعنيكي
وسايبلك المصروف
هو أنتي ليه ماجتيش
لو بالبُكا راجعه
عيني هتطرح بحر
أنا نفسي أسمعك تاني
يا أم أجمل صوت
يا خالق المخاليق
هصحى وأنام على الصبر
ولو اللُقا عندك
فـ أنا راضي عادي أموت
الناس خلاص زهقت
من كُتر ما ناديتك
وبيقولوا كف نواح راجل وبتعيط
أنا بس عايز أقول أنتي اللي حبيتك
وانا فـ الحياه دونك عايش لكن ميت !