قصيدة : الميزان . مسابقة الشعر العامي بقلم / هاجر فايد

هاجر إبراهيم سيد أحمد فايد
اسم الشهرة :هاجر فايد
المجال :شعر عامية
الغربية -مصر
الايميل : [email protected]
عنوان القصيدة :الميزان

غَمَّضت عيني/ لـْ جُوّا فتّحتَّها
مَريَم ناداها الوحْي من تَحتَها
أنا كُنت بسْمَع وابتدِيت أستَمِع
إسْحَب إيديا يجوز معاك أجتمِع
وِسط الهياكل طِفل باكي امسِكُه
وإحيي الحروب، العضم بيشَوّكُه
في رقبتُه حبْل واصِل له من سُرِّته
شوّش في قلبه بياضُه من سُمْرِتُه.

أشهَد بإني فَرشْت لِك مَفرشي
عَرشي في خُطاكي على الصراط،
عَرّشي..
هذا الطريق يتهدّ لو يتمشِي
وبدون وقوعي
ماتِعرفيش تطْلَعي ..
جسمِك جميل، اخترْتْ تتبَقّعي
عقلك هزيل ،اخترتِي تتقَوقعي
روحِك مسافرة لحد ما هتنتِشي
ويايا سافري بدون ما تتوقّعي:

أما الجَدار، يستُرنا كُل ما عَلا
لو ساترَه حُب
أسكُن وادوق سَلوِتي
لو ساتْرَه “خوف”
هيخِرّ م القلقلة

-أما السفينة،مفيش ضَمان في الخَلا
لو شايَله “حُب”
هتستقيم بُوصلتي
لو “إبن نوح”…
تغرَق من الخلخلة.

– أما الغلام فـ هُوْ كان وهيكون “أنا”
مرّ الزمان
لو تقبَلي بقسمِتي..
فيشع نورنا
يغطي ع المئذنه!
كان إيه يميز طفلي غير صرخته
زي المطر ماشوفوشي،
أسمع زخّته
آدي الميزان اللي مَلوش مُنتهى
يسمع أنيني.. تترجِمه كمنجِته
تنزِل دموعي..
يقول عيونِك مها.