حسن عبدالهادى الجيار
الشهرة حسن الجيار
قصيدة بالعامية المصرية
القاهرة
(انت فينك يالقضية)مهداة للشعب الفلسطينى الصامد فى وجه العدو الصهيونى المتغطرس
انت فينك يالقضية
ماشية ليه من غير بطاقة
عايشة ليه من غير هوية
عايشة ليه مخنوقة ارضك
كله خاين خاض فى عرضك
واللى مظلوم هو شعبك
كل يوم بيموت فداكى
انتمائه ترابك انت
مش لعباس أو هنية
علمونا فى المدارس
سفر تكوين القضية
علمونا إنك أبية
علمونا إزاى بعوك
حتة حتة وقسموك ع الرعية
علمونا إزاى صمودك
لما وعد يبيع حدودك
طرح خيرك ..روح جدودك
لما اعداءك يطاطوا
ويبعوكى بالمزاد
للخنازير والكلاب
شوهوا اصل الملامح
إنما رغم السنين لسه باقية جوه فيا
وانتفاضتك نبضها بيصحى فيا
علمونا إنك ضحية للتخادل والخنوع
وان فيه مليون طريقة للتنازل والخضوع
أنما احساسى بيك واللى بيحببنى فيك
الحجارة اللى فى اديك والتحدى اللى فى عنيك
والصبى المليان تحدى والصبية
هم مفتاح الخريطة للرجوع
علمونا فى المدارس
لا انت غزة ولامزة وأن خمرك مش أريحا
وإنت فوق الكل واحد
علمونا أنك أبية
علمونا فين حدودك ع الخريطة
فين جبينك الطويل ولا شعرك الحرير
والعيون السلسبيل اللى ساكنة جوه فيا
لما كنت طفل لسه بحضن الحلم الجميل
واركع الركعات واصلى تحت شمسك فى الخليل
ياما كنت أتمنى اشوفك
ألمس الخدين وابوسك
تحضنينى بين كفوفك تمسحيلى دموع عنيه
إنت يا أشرف قضية
حسن الجيار
