ط
الشعر والأدب

قصيدة : بيفهم عني . للشاعر/ أشرف الشافعي

الولد الواقف ورا سور بلكونة روحي ..

يشاور على بكره

سهّاني وبقى راجل !

قلت له ح اخطف مشوار للغربة صُغيّر ..

وراجعلك تاني ..

اياك تتشاقىَ

لكن ما استناش ..

وبسرعة مَدْ ايديه ع الأُكرة ..

وبَصْ على الدنيا

كان عايز يسبقني !

كان عايز يثبتلي انها مش فارقة معاه

ساعات ..

لما كنت باهزر ويَّاه ..

وازغُرله

كان يضحك ويقول : مش خايف !

جايز كان نفسه ..

يعملي مفاجأة ويكبر

أو كان نفسه أصغرله

الولد اللى الدنيا حَنّت مرة عليا ..

ف أوكازيون الفرحة ..

و اديتهولي هدية

بقى أطول مني

طب والله الواد ده بيفهم عنيْ !

ماهو لما يحسسني وانا معاه ..

انى ماعشتش سني ..

يبقى بيفهم عنيْ

واما بتتكعبل روحي ف خوفها ..

والاقيه بيُحضُنيْ …

يبقى بيفهم عني

واما يقوللي : يابابا اتطمِّنْ

الحزن برغم هجومه ..

على قلوب الناس ف بلدنا

ما عرفش يوقّع بين الحلم وبينهم

يبقى ازاي ما اخجلش ؟!

واما أحس ان حاجات اتقالت وِسْط كلامه ..

مع إنه ماقالش !

يبقى ازاى ما اخجلش ؟!

واما الاقيه فاجأة وقبل ما أسرحْ ..

بيغير مــود الغربة ..

لقعدة عيلة بحبة ألش !

دا نا أبقى حمار ..

لو ماعرفتش أفرح ..

واهزم كل الوجع اللى قاتلني

ارجوك يامحمد ..

ارجوك

حسسني انك دايماً ..

فاهم عني !

admin

فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون
زر الذهاب إلى الأعلى