***********
انفرط عقد الحياة
والحَب واخد سِكته
نحو النهاية المؤلمة
والدمعتين فوق الخدود
مش لاقية سد يلمها
ويضمها جوة تجاويف المنى
والصوت لوحده بيتخنق
بحبال ألام يأس العجز
وايدين تجاعيد الزمن
بينادى على أقرب وتر
فى دايرة الخوف م الأجل
انوي الصلاة
على من حضر
من لؤلؤات عقد انفرط قبل الفطار
وادعى النهار
يستأذن الليل الحزين يصبر على
ورد انقطف
قلب اتخطف
من بين ضلوع صبر المرض
يصبر على
خطوة بتسعى
كل يوم على رزقها
من أول الفجر اللي ابتدي
يطرح بشر
ولحد أخر ضوء ضهره انكسر
تحت الظلام اشترى كل الطرق
من غير ثمن
يمكن دعاء شمس الأمان
يوصل إلى أبعد مدى
ويشد آخر نبض ف سحابة مطر
بتطل على أرض العطاشى للحياة
ويمر بيه عبر سماوت الوجع
وسنين الفزع
يمكن يبرد قلبي الحزين
اللى اتحرق
من نار فراق آخر أمل
ويشد من عزم حيلي اللى انحنى
جوة التابوت
ويجر وسطى اللى انخلع من جتتي
لحظة ما شافت دمعتي
حلمي الوحيد جوة الكفن
***********************
