“ترس الساقيه ”
**************
وترس الســـــــاقيه لما يدور
بيحضن بين دراعاته هموم التور
فيجمعها ويطرحهـــــا أمل مبدور
تحيــــــــا البور
وتتمخض سنــــــــابل خير
تلاغي الطير وتتمايل مع النسمه
وتضحك للندى بدرى
يقوم يجرى ويلمس خدها الصاحى
فيلسعهــــــــا الحنين تتخض
يعض البرد اوراقهـــــا بحنيه
فتتبسم / وتنده شمسها تطلع
تصب الضى على عــــــــودها
وتسقيها الدفا ترتاح
شقا الفلاح / واخرة صبره ع العيشه
وتحــــــــــــــويشة عرق وكفاح
بيستنــــــــاها زى العيد
بعزم شديد / ووقت حصادها بيغنى
مع المنجل / تزغزغ فى السبل يرقص
كأنه عريس فى يوم فرحه
مابيهموش كلام الخلق لو جرحه
كفايه عليه يكون فى الجرن
ويحلم بالرغيف فى الفرن
حمام فى الخن بيلقط رزقه يتقوت
وتبن عليق لتور الساقيه اخر الليل
عشـــــــــــــــان بكره يشد الحيل
ويحضـــــــــن ترسها تانى
ومــــــــــــــن تانى تدور وتلف
وتروى الارض والفـــــــــلاح
***************
قلم حلمى قاسم
