جميلة .. حتى فى حزنك
ولون الدمع ف عيونك
بيحكى جمال
جميلة .. حتى فى خوفك
باشوفك كل ساعة بحال
ساعات يعلى المطر فيكى
يخليكى وجع متشال
وأوقات تفرحى وصوتك
تنور طلته بيوتك
كأنه جبال
جميلة .. وانتى بتنادى
سحاب طايرة فى رحلة عمر
ليلها خيال
جميلة .. الضحكة ف عيونك
ولا يوصف جمال لونك
كلام يتقال
تسافر ليكى أيامى وأحلامى
على كتاف الامل تتشال
جميل .. البحر وكلامه
وانغامه تهادى القلب
لحن خيال
أنا حبيت .. جمال الليل
وكلمنى وعلمنى
أقول ف البحر ميت موال
وسافر عمرى ويا الموج
ولسه رحلتى ع البال
أنا حبيت .. جنون الرمل
وعلو الموجة.مهما طال
وسافر قلبى بخياله
كتير قالوا عليه رحال
جميلة .. فى تفاصيلك
وتسبيحك وترتيلك
بيحكى صرخة المغلوب
ويوصف ضحكة الاطفال
جميلة .. ف كل أحوالك
وأهوالك كما الدنيا
جواب وسؤال
أنا التايه بدون عنوان
لقيت قلبى أسير بيتك
وحبيتك وخبيتك
ف قلبى فى جميع
الاحوال
شريف الانبا كاراس
