خاص بالمسابقة
فئة شعر العامية
الاسم / باكينام حسن محمد حمزة
الشهرة / هيومه حمزة
قصيدة
حبر سري ،،
اللي بيني وبين عيونه
حب غالي… وقلب شاعر ،،
قلب شايل جوا منُه دُنيا تانية مـ المشاعِر..
صعب جداً حد يفهم ، أو يفسر حبي ليه
صعب مايِظهر عليا اي شيء
من عشقي ليه
نفسي يفهم مهما أخاصم ، جُوا نصي فيه طلاسم ، فيه حاجات مالهاش تناص ،،
دي حكاية عشق سري
وإن قالولي فـ مره قِري برضو عشقي
عشق خاص ..
عشق عامل ميت مُظاهرة
عاوزه قلبه يبقي ليا
عشقي بيطالب بحقي فـ كل ليلة
يغيب عليا ..
صبري فاض والله بيا ..
عاوزه ألمح يوم وأبوح ،،
القصيدة اللي فـ عنيا صابها مَس من الجروح..
والصراحة تعبت جداً
والكلام إتهد مني ،،
حاسه أقرب حد ليا ، هو أبعد حد عني..
خايفه أصحي عـ الفراق
واللي بينا يروح بلاش ،،
كل ليلة الشمس تطلع ، والقي صُبح العين ماجاش ..
ياللي سامع نبض قلبي
قولي مين خلاه يقاسي..
قلبي من أشواقه فرق تَمر عشقه عـ المراسي..
مد إيدك يالا واسي ، وبوس حروفي المُنهكين ،،
ياحبيبي مش هاتفرق اللي يبدأ فينا مين..
دا إحنا أجمل عاشقين
والليلادي هداوي ألمي ،،
هاأجي وأنزل أرض عشقك ، وكل يوم هاأرفع فـ علمي..
حالفه أغير حبر قلمي بحبر مُلفت للعيون.. !!
ناوية ألم عيال حروفي فـ نص عالي
من الجنون ..
وأجي وأعمل بث حصري وأملا كل الكون أغاني
كل كلمة كتبها قلبي بحبر سري
هاأقولها تاني ..
مـ الليلة دي خلاص هاأغير
من طريقتي فـ الكتابه ،،
هاأكشف السِر اللي دخل سِن قلمي
ف الكآبه..
كل كلمة كتبها قلمي بحبر سري
هاأبوح وأقولها ،،
مـ النهارده هاأسيب مشاعري
تعلن السر وميولها..
(حبري/ حبي ) سِري بس لازم اكشفه قدام عنيهم
مش ح أشفر عشقي تاني ‘
مش ح أخبي الشوق عليهم ..
كُله بااااااين
حرفي منصوب له الكماين ،،
ف النهارده
كل كلمه كتمها قلبي ….
كتبها قلمي بحبر سري
ح اقولها ليهم…!!!
فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون
