حب الوطن
…………………..
الوطن
مش كرسى حاكم
او حكومة
او محاكم
الوطن شارع وحارة
والدفا ف البرد ساكن
الوطن وش الطيابة
اللى مرسوم ف الاماكن
زقزقات عصفور ف شجرة
والسنابل والغيطان
صدر ام كبير ضا ممنا
فيه بنشعر بالامان
لما نعطش منه نشرب
شهد سرسوب الحنان
الوطن اكبر واجمل
من كلام افصح لسان
أب يشقى عشان ولاده
ام تدعى بالهداية
صاحبك اللى ف عيد ميلاده
ابتديت اجمل حكاية
بنت سمرا بجلابية
ضحكة حلوة ومستحية
نظرة خاطفة وفرحة جاية
فصل اول م الرواية
ضحكت النونو الجديدة
امتدادك للنهاية
واما يوم يتعرى بدنك
الوطن يصبح عباية
يسترك ويدفى قلبك
يرفعك فوق الجبين
يرسم الضحكة العريضة
لو لقاك قاعد حزين
أو يمد ألايد وياخدك
للصلاة ف سيدنا الحسين
والبخور والريحة طالعة
مسك عطر الطيبين
مهما تبعد عنه ترجع
وانت مليان بالحنين
الوطن مش بس دنيا
الوطـــــــــــــــــن
ع الارض دين
ابو العبادى
فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون
