فتحت عيني في حضن حَضّانة
وسمعتهم في الأوضة مرعوب قلبهم
أول ما شُفت أبويا قدامي
كات عينه غرقانه فديون الموت
خايف عليا ان النَفَس يهرب
كان وقتها
بيدوس على العالم ميوت..
رعشة القلب اللي فيه
بتوطي صوت الخلق
بيقول في ودني التكبيرات ويقوم
يرفع إيديه
يدعي
ياربنا ” ضلعي ”
وإن كان على سد الديون
خليلي ابني يعيش
أو سد دينه بأخر انفاسي
شُفت الدموع في عينيه
ودُقت طعم القلق
قبل أما يتعلم لساني كلام
كان زعلي خلى لساني يومها اتشنق..
طبطب عليا
ضمني وقالي
إحنا البشر
أروحنا في عنينا
ف إياك تعيط تنتهي
وإن كان لابد دموع
استلف عيني
عمري اللي باقي من الأساس
حوشته من صغري عشان زعلك
عشان لو يوم فشلت إنك تبطل موت
أموت قبلك
و قالي كمان
عن الحضن اللي لسه ايديه
طوابع فوق حيطان قلبي
و قالي كمان
يا عبدالله وجلال الله إذا ينفع
لكُنت أبدل الحسنات
واشيل ذنبك مع ذنبي
حضني المرة دي لكن
حضني عشان بقسوة الغايب
وحسيته..
دخل جوايا قلبه وداب
وسابلي عينيا بتزعق لعتب الباب..
و سابلي عيونه جوا الدرج
وسابلي ضحكتين منه
في وسط حمامنا جوا البرج
لكّنه كمان مع سفره
أخد مني الدفا و الحب
و سابني في نن عين الشمس
أحس التلج
وخلاني بموت م الغيظ
إذا تسمع وداني “المرج”
وخلاني.. بموت تاني
إذا يتقالي مستقبل
وإذا يتقالي يا بنا
يفيدني بإيه بنا الجدران
وحضنك بيت وقلبك كان لنا الجنة.
فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون
