……….
لمّا زاد الإنكسار
الغرام أعلن نهايته
جرح جوّه الروح بدايته
والنتيجه المُرّه كانت
إنهزام عمري اللي ملكك
كنت ف الأحزان شريكتك
بس ف الأفراح رميتني
كل يوم عن يوم باعدني
والغرام بشويش دبحته
إنهزامي بإيدك انت
لمّا سلّم قلبي رايته
كنت حلم ف يوم حلمته
فجأه حوّلته لكابوس
يسوى إيه جرح النفوس
اللي ييجي بإيد حبايب
النهار من عمري غايب
والليالي العتمه طالت
طعنتك ف القلب صابت
والوريد بينز دم
نقطه حزن ونقطه هم
واللي عينك عاميه عنُّه
إنُّه نازف منّي لكن
كل نقطه فيها إسمك
فيها صورتك
فيها حبّك
يعني جرح القلب منّك
وانهمار الدم شدّك
من وريدي لبرّه منّي
كل شئ ف هواك كسرني
وانت خارج ف انكساري
زيد بجرح الجرح ناري
لجل يخلص من وريدي
كل حرف ربطني بيك
سيب رصيدك يبقى فاضي
حتى من نظرة عينيك
مش رح اندم يوم عليك
م انت من غدرك وكدبك
جيبت للقلب انهزام
سيبلي قلبي ف توب حداده
أما دمّي ..
راح معاك لحظة خروجك
يعني ع الدم السلام
سيبلي قلبي ف توب حداده
دي النهايه
دا الختام
………………………………………
