قصيدة :سرك عزيز . للشاعرة / شيماء أبو سمرة

سرك عزيز

والسر ناطح للسحاب

واصل لفوق حدى

انا

عارفاك ياميت فالتراب

اللى مسحته بخدك

العاشق كمان

كام سنة

رحماك بخوفى وبضلوعى تميل عليك

وان جيت فمرة اشتكيلك اشتكيك

ماتلومش عينى المحتاجين للننى فيك

ماتقولش ليه قلبى

استوى

وأما اتلهى.. دور عليك

كنت الملاذ المعتمد

سميتك انت للأبد

سند الغزاة

فلقد غزتنى وانتهيت

بالحرب من غير

احتياج

عارفاك ياميت فالتراب…!!

عارفانى بعلن انسحابى

وارد بابى يمكن القى

فيك خروج

عارفاك يابحر من الحنان

وانا كنت موج

اول ماتهدى من جنانى

راح أرسى ليك

كل الموانى شكل تانى

انت الامان كان

مشتريك

شبعانه منك ذكريات

مليانى من كل الحاجات

اوقات بحس معاك بنور

اوقات تطل عليه

من بعد الغيوم

شماك فى ريحتى كل يوم

حسانى بعتبرك مطر

حساك قدر

شايفانى بعينيك الحزينة

أو زحمة فى دروب المدينة

أو حتى ركنة فالفضا

معشوقة فسكوتك

قضا

وواصلنى بوحك

من زمان

ياابو أغلى حتة فى الميدان

صوتك كما ضرب الكمان

أو سيمفونية بطعم ناى

حب اللى جاى

يمكن اكون آلة زمن

بس التمن

هيكون ملامحك والضلوع

مفيهاش رجوع

ملكى انا..