عداوتى هشة
بنت لحظة
مالهاش جذور
بتتولد
وتموت ف صرخة
تترمى في وش ظالم
وش لص
وش
بنت غشيمة
فتحت باب جنينة روحها
للعابرين
للصيادين…بحسن نية
عوروا جناحها
بطلقة رش
طلقة غش
عداوتى لحظة
ربنا خلقنى طفل
كبرت طفل
بالغباوة
والشقاوة
والغلاسة
والتحكم
حتى بعد ما طارت العصافير مهاجرة
من ضلوعى
وعش وشي دلدل القش ف خدودى
لسة عيٌل
بالبيجامة
والخناقة
ع البالونة
ولعب كورة
وتختة أولي
لسة عيل
كل مرة حبي أول مرة
عينى من أقل شئ تعيط
لوم ف غنوة
فراق ف فيلم
كتاب بتخلص فيه روايه
شفت عاشق الروح ألف مرة
وكل مرة
بقسم المزيكا وعياط الريحانى
نغمة نغمة
دمعة دمعة
قلبي من أقل شئ ينهنه
نعى ف الجورنال لواحد إسمه جورج
إسمه أديسون
إسمه صفوت
قلبي زى عداوتى هش
ربنا خلقنى
أرق من صوتى الأجش
من ملامح وشي
بالخرابيش
بره منى البحر طيش
جوة منى …سبحة
وأستغنا وخيش
مستغطى بيه درويش
وهى إيه الدنيا
غير
كلمة حلوة
ضوء من ورا الشيش
عداوتى هشة
بنسي
إنسي
عدى
سامح
كلنا
غرقانين بنتشعلق ف قشة
