عملت شاعر و معرفش ان الشعر له بحور. . و انه طريق واعر مش بس ورد لا شوك كمان مبدور. .. .. عملت عاشق و العشق داء و دوا. . حلو يا طعم الغرام مر يا جرح الهوى. . و الخاتمه كانت عتمه و كنت فاكرها نور. .. .. عملت حداد لجل الحديد مايلين. . لان الحديد و القلوب لسه يا ناس قاسيين. . لا يفيد معاهم شوق و لايردهمش حنين. . ساكنين فى قلب القلب لكن ما بينهم و بين العين عملوا م الغياب ميت سور. .. .. عملت درويش و طوفت فى البلاد مشتاق. . انده على اللى هجر و ادعى عليك يا فراق. . اسرنى اللى هويته و باعنى فى الاسواق. . عليل و كان الداء عشقى لاجمل بنات الحور. .. .. عملت صياد و البحر كان عالى. . و لما موجه غدر ضيعلى راس مالى. . راح اللى كان فى يمينى و اتبقى القلب فى شمالى. . و رجعت بالشبك خالى و كمان الشراع مكسور. . عملت شاعر معرفش ان الشعر له بحور. . و انه طريق واعر مش بس ورد لا شوك كمان مبدور. .. .. #خالدعبدالمعطى
