**************
غمض عينيك
وإبدأ خطاوى رحلتك
عبر المنام
وافرد إيديك
وأحضن معاني كلمتك
وارسم مقام
حواليه تطوف
كل العيون المغرمه
تلمح سلام
حواليه تطوف
كل القلوب المغرمه
تُبدر غرام
غمض عينيك
وإبدأ خطاوى رحلتك
عبر المنام
واحلم تنام
فوق فرشه خاليه من بُقع
دم الغلام
وف حضن خالي من وجع
إيد اللئام
علي أرض خاليه من خُطا
ابن الحرام
غمض عينيك
وإبدأ خطاوى رحلتك
عبر المنام
واحلم تعيش
علي صخره رافضه يتولد
بينا إنقسام
وخصام بينهش لحمنا
من غير كلام
وانسي العيوب اللي ابتدت
تغزو الأنام
وبلاش يكون عقلك شغوف
يمشي ف طريق
كله إنتقام
غمض عينيك
وإبدأ خطاوى رحلتك
عبر المنام
واحلم تطوف
حوالين رفوف كل الحياه
وافرد شراعك
واجعله طوق النجاه
وافرد جناحك ف السما
زى الحمام
وامنح اشاره لضحكتك
تبقي إبتسام
غمض عينيك
وإبدأ خطاوى رحلتك
عبر المنام
وبلاش تَأَمٌل ف الوجع
وللا ف الملام
وإنت تلاقيك قدام عينيك
إنسان تمام
عيش الحياه بمحبتك
واكتب بشوقك غنوتك
بكره الغُنا
يطرح سلام
******************
رضا أبو الغيط
