لا تلومنى
لو عيونى غصب عنى
كلًموك
أو ف مره وانت ماشى
وقفوك
لجل يسأل نن عينى
نن عينك
ليه ظنونك فهموك
إن قلبى ساكنه غيرك
وان غيرك خد مكانك
تحت رمشى
وانى واحد
م اللى كانوا بيخدعوك
لاتلومنى
لو ظنونك حَسسوك
إن عصر الحُب فات
والحنان ف القلب مات
واللى بينا ذكريات
والمشاعر كات خناجر
بالخيانه بيقتلوك
لا تلومنى
لو عيونى غصب عنى
دافعوا عنى
أو عواطفى
حاولوا مره يفهموك
إن قلبى ف كف ايدك
وان حُبى اللى وريدك
كان حقيقه مش شكوك
وان دمع العين عليك
صوته دايما بيناديك
ترمى ظنك تحت منك
واما عينى عليك تعافى
أبقى عافى
مَ العيون دى
يا حبيبي
ياما كانوا…. بيشلوك
لا تلومنى
لو فؤادى قال لى نادى
ع الأيادى المرعوشين
وأسأل القلب اللى كرهك
هو راح الحُب فين
وللا فين راح الحنين
قول لى مين غير عواطفك
ولا مين دول غيروك
وانت عارف
ان نظره من عيونك
سهل تقنع نبض قلبى
والعيون دى يعذروك
وبحنانى
أقدر أقنع نبض قلبك
إنى طول العمر جنبك
وان شكك
ظُلم طرحه كله شوك
لا تلومنى
لو عيونى غصب عنى
كلًموك
أو قالوا لك
إن كل حروفى حابه
يرسمونى ويرسموك
صوره ف ميدان الأحبه
تحت منها
اكتب بدمى
انى هفضل طول حياتى
ولمماتى
أوفى من كل اللى قالوا
بيعشقوك
*****************
رضا أبو الغيط
