قصيدة .مانيش نازل . مسابقة الشعر العامى بقلم / محمود السيد

خاص بالمسابقة
قصيدة “مانيش نازل”
عامية .
محمود السيد – مصر .
https://www.facebook.com/profile.php?id=100026333891018

مانيش نازل ..
ولا عن صوتي هاتنازل واقول ارحل
يقولوا زي ما يقولوا
انا رافض أكون شخشيخة أو يويو
في إيد من كل هب ودب
وأغلط تاني واتندم واشيل الذنب
ولا هاسمع كلام آسف
ولاد الكلب ..
عشان يعني من الآخر كلام كداب
كفاية خراب
كفاية سراب
ما عشنا سنين كما الأغراب
بناكل بعض شرق وغرب
يا ناس دي حياة أكيد مش حرب
كفاية عذاب
شبعنا فرقة الأحزاب
وحنينا للم الشمل
بقولها لكم بعلو الصوت
انا مش حمل تاني ضغوط
فرح شغال مافهش نقوط
مش اسمح إني اكون تاني ..
في قلب الساقية تور مربوط
مغمي عينيا مش شايف
انا إنسان ومن حقي
أعيش آمن ومش خايف
شبعنا ثرثرة وحوارات
بلاش إحباط ..
بلاش ثورات ..
ولا بيها خلاص هاهتم
كرهت يا خلق شكل الدم
كفايه بعزقة ويلا بقى نتلم
ولا نسمعش صوت فتنة
ولا نخرجش من بيتنا
دي ناس ع الشر ناويه لنا
وكل مناها فرقتنا
يا رب احمينا من نارهم
وتبعد عنا أشرارهم
رفعنا إيدينا داعيينك
إلهي برحمتك غيتنا .

#محمود_السيد